Kilimo cha mijini

Kituo cha kilimo Malolo chenye jumla ya hekari 45 kinapatikana katika Kata ya Mabwepande jijini Dar es Salaam kinamilikiwa na Halmashauri ya Manispaa ya Kinondoni na ni mahsusi ili kuwawezesha wananchi kupata fursa ya kujifunza masuala mbalimbali kuhusu kilimo, mifugo na usindikaji.

Mafunzo ya kilimo cha kisasa, umwagiliaji wa matone, matumizi ya neti maalum za kilimo pamoja na masoko hutolewa bure kwa makundi ya vijana, wanawake na watu wengine ambao ni wakazi katika Manispaa ya Kinondoni.

Mazao yanayolimwa katika Kituo cha kilimo Malolo ni Alizeti, ndizi, mazao ya mbogamboga ikiwemo mchicha, majani ya maboga, matembele, sukuma wiki, biringanya, majani ya kunde n.k.

Mboga za matunda zinazolimwa katika Kituo cha Malolo ni pamoja nyanya, pilipili, pilipili hoho, maembe, mapapai, matikiti maji, matango pori na machungwa. Mahindi mabichi pia yanalimwa katika Kituo cha kilimo Malolo kama zao la biashara.

Wakulima pia wanapata fursa ya kufundishwa matumizi ya kitalu nyumba ambayo hutumika katika kuboresha mazingira ya ukuaji wa mimea hususan kupunguza joto kali kutokana mionzi ya jua pamoja na kutunza unyevunyevu katika udongo. Neti maalum za kilimo hutumika katika kitalu nyumba ili kupunguza mwanga mkali wa jua pamoja na kuzuia wadudu waharibifu kwenye mimea.

Umwagiliaji wa matone ni aina ya umwagiliaji ambayo hutumia mipira maalumu yenye matundu au isiyo na matundu, ambapo mtumiaji ataitoboa kulingana na nafasi ya zao husika. Maji hutolewa kwa mfano wa dripu katika kila shina ama penye tundu. Mfumo huu wa kisasa wa umwagiliaji mimea hasa mazao humwezesha mkulima kulima kipindi chote cha mwaka pasipo kutegemea mvua, kumwongozea uzalishaji wa mazao pamoja pato la mkulima na pato la taifa kwa ujumla.

Faida za umwagiliaji wa matone ni kama zifuatazo: -

• Matumizi ya maji ni kidogo
• Mbolea za chumvichumvi zinaweza kuwekwa kupitia mfumo huu (fertigation), ambapo huchanganywa kwenye tenki la maji kisha kufikishwa karibu na mizizi,
• Maji yanapelekwa pale amboko mimea inayahitaji, siyo pale ambako hayaihitajiki
• Magugu yanapungua kwa sababu hayamwagiliwi (isipokuwa sehemu iliyo karibu sana na mazao)
• Hatari ya magonjwa wa fungus inapungua kwa sababu majani yanabaki makavu
• Mfumo unahitaji msukumo “pressure” kidogo tu na hii inapunguza gharama za nishati (diseli, umeme) kwa ajili ya pampu hata pampu ni ndogo hivyo rahisi zaidi
• Mmomonyoko wa ardhi shambani unapungua sana
• Hatari ya kuongezeka kwa chumvi ardhini inapungua sana
• Hupunguza gharama za wasaidizi shambani
• Kubwa zaidi njia hii huokoa muda