KINONDONI YATEMBELEWA NA BARAZA LA MADIWANI KUTOKA HALMASHAURI YA MANISPAA YA MOSHI

Tarehe iliyowekwa: October 11th, 2017

  Mstahiki Meya Manispaa ya Kinondoni Mh Benjamin Sitta Leo amepokea ujumbe wa Madiwani ishirini na tisa (29), pamoja na watendaji nane (8),kutoka Manispaa ya Moshi kwa lengo la kujifunza na kubadilishana uzoefu katika utendaji na hatua zinazotakiwa kuchukuliwa katika maswala yanayohitaji kufanyiwa maamuzi. 

 Akiwakaribisha wageni hao, Meya Sitta amesema ni faraja kuiona Halmashauri ya Kinondoni inakuwa sehemu ya mafunzo kwa baadhi ya vitu inavyovitekeleza pamoja na utendaji wake. 

 Amesema wakati umefika wa kuhakikisha tunatekeleza kwa vitendo, kwa kushirikiana na wenzetu ambao kwa namna moja ama nyingine wamepiga hatua katika kufikia malengo ya jambo wanalotaka kulitekeleza. 

 Ujumbe huo chini ya Mwenyekiti wake Mh. Raymond Mboya ulipata fursa ya kujifunza na kufanya majadiliano yaliyotokana na mada mbalimbali zilizowasilishwa kwao kutoka kwa wataalam wa idara ya fedha, Uchumi, Maendeleo ya Jamii, pamoja na Usafishaji.

 Kadhalika Ugeni huo umepata fursa ya kuwasilishiwa mada zihusuzo Namna bora ya ukusanyaji wa mapato,Jinsi ya kushughulikia malalamiko na changamoto zitokanazo na utekelezaji wa miradi inayofadhiliwa na World bank, Utengenezaji wa mbolea ya mboji pamoja na mahusiano ya miji dada na miradi inayotekelezwa kushirikiana na miji Dada hiyo. 

 Naye Mstahiki Meya wa Manispaa ya Moshi Mh Raymond Mboya ameishukuru Manispaa ya Kinondoni kwa kutenga muda pamoja na maandalizi mazuri kuhusiana na mada pamoja na mafunzo waliyoyapata.

 Imetolewa na
 Kitengo cha Uhusiano
 Manispaa ya Kinondoni.