KINONDONI YAPOKEA VIFAA VYENYE THAMANI YA TSH MILIONI SABA KUTOKA KWA WAFANYABIASHARA WA MASOKONI.

Tarehe iliyowekwa: September 21st, 2017

NI KATIKA KUUNGA MKONO JITIHADA ZA MKUU WA MKOA WA DAR ES SALAAM KATIKA KUIMARISHA MIUNDOMBINU SEKTA 

Manispaa ya Kinondoni imepokea vifaa mbalimbali vyenye thamani ya shilingi milioni saba kutoka kwa wafanyabiashara wadogo wadogo wa Masokoni.

Vifaa hivyo vimepokelewa leo katika ukumbi mdogo wa Elimu wa Manispaa ambapo wakuu wa idara na vitengo pamoja na wafanyabiashara wa masokoni walikuwepo.

Akikabidhi vifaa hivyo Mwenyekiti wa MUMADA ndugu Mohamed Mwekya amesema hatua hii ni katika kuunga mkono jitihada za Mkuu wa Mkoa wa Dar Es Salaam Mh Paul Makonda za kuimarisha miundombinu ya sekta ya elimu kwa kujenga  majengo ya utawala na vyoo katika shule za Msingi na Sekondari ili kuandaa Mazingira mazuri ya walimu katika shule hizo.

Amevitaja vifaa walivyovikabidhi kwa Manispaa hiyo kuwa ni Mchele kilo 2835, Maharage kilo 630, pakiti za chumvi pamoja na vifaa vya usafi.

Akipokea vifaa hivyo kwa niaba ya Mkurugenzi wa Manispaa ya Kinondoni Bi Mwajuma Magwiza ambaye pia ni Afisa Maendeleo ya jamii  amewapongeza na kuwashukuru wadau wote walioguswa na kuunga mkono jitihada hizi za Mkuu wa Mkoa za kuondoa changamoto katika sekta ya Elimu.

Amesema "kama Manispaa ya Kinondoni tunawashukuru sana wafanyabiashara wetu, na tunafurahi kuona kwamba wapo mstari wa mbele kushirikiana nasi kwa kila jambo na pia ni wadau wenye nia njema kabisa ya kuona miundombinu ya sekta ya elimu inaimarika"

Ametoa wito kwa wadau wengine walioguswa kuendelea kushirikiana nasi katika kufanikisha Jambo hili kwa kujitokeza na kutoa michango yao ya hali na mali.

Imetolewa na

Kitengo cha Uhusiano

Manispaa ya Kinondoni.