DC GONDWE KINONDONI AKABIDHIWA OFISI RASMI

Tarehe iliyowekwa: June 24th, 2021

Aliyekuwa Mkuu wa Wilaya ya Kinondoni ambaye kwa sasa ni Katibu Mkuu CCM Taifa  Mhe. Daniel Chongolo leo amekabidhi ofisi ya Kinondoni kwa Mkuu mpya wa Wilaya hiyo Mhe. Godwin Gondwe hafla iliyofanyika katika ukumbi wa mikutano wa Manispaa.

Akikabidhi ofisi hiyo pamoja na majukumu yake, amesema Kinondoni yenye Kata 20, Mitaa 106, majimbo ya Uchaguzi mawili, na kipaumbele chake kikubwa kikiwa ukusanyaji wa mapato ni mahali salama pa kufanya kazi kwa kuzingatia sheria, kanuni na  miongozo iliyopo yenye kuleta tija na maslahi mapana kwa wananchi na Taifa kwa ujumla.

Amesema "Wakati nakabidhiwa Kinondoni kutoka kwa kaka yangu Ally Hapi, ilikuwa salama kabisa, Mimi ndiye nilikuwa nimekabidhiwa hili gurudumu la kuiendesha kwa wakati huo, na sasa nakukabidhi wewe, uendelee nayo kwa uhuru, amani na kwa kufuata sheria, taratibu na kanuni zilizowekwa kwa maslahi mapana ya wananchi na  wala usiingiliwe na mtu yeyote". Katibu Mkuu CCM Chongolo amefafanua.

Aidha Katibu Mkuu huyo wa CCM Taifa pia ameziainisha changamoto zinazoikabili Kinondoni kuwa ni ukusanyaji wa mapato, ardhi, usafi pamoja na suala la ulinzi na usalama.

Naye Mkuu mpya wa Wilaya hiyo Mhe. Godwin Gondwe katika mazungumzo yake, amekiri kupokea maelekezo yote na kuahidi kuyatekeleza ikiwa ni pamoja na kushughulikia changamoto zilizoainishwa kwa maslahi mapana ya wananchi na Taifa kwa ujumla.

Alipokuwa akizungumza Mkurugenzi wa Manispaa ya Kinondoni Bi.Sipora liana, amempongeza Katibu Mkuu CCM Taifa Mhe. Daniel Chongolo kwa kuteuliwa kushika nafasi hiyo na kuahidi kuyaenzi yale mazuri aliyoyafanya na kumkaribisha Mkuu mpya wa Wilaya Mhe. Godwin Gondwe huku akiahidi ushirikiano katika kutekeleza majukumu yanayompasa.

Hafla hiyo imehudhuriwa pia na viongozi wa Chama na Serikali, Kamati ya ulinzi na usalama Wilaya, Taasisi za Serikali na binafsi, wadau wa mazingira, Wakala wa vipimo, Waheshimiwa Madiwani pamoja na wakuu wa Idara na Vitengo.

Imeandaliwa na

Kitengo Cha Habari na Uhusiano

Manispaa ya Kinondoni