Kata ya Mbweni ni miongoni mwa Kata 20 za Manispaa ya Kinondoni. Asili ya jina Mbweni ni uwepo wa bandari kubwa ya asili iliyokuwa inatumika na Wareno enzi za ukoloni, jina ambalo wageni na wenyeji walilitumia wakimaanisha ni sehemu tulivu.
Sehemu ya BANDA MOJA, kwa sasa ni MITI 3 kulikuwa na makaburi ya Wahindi, Waarabu na Wasomali ambao wote walifika katika vipindi tofauti eneo la Mbweni kwa ajili ya kupakia na kushusha bidhaa zao kwa kutumia eneo la bandari lilikokuwa likijulikana kwa jina la STAHABUU ambalo kwa sasa kuna kambi ya kijeshi ya 19 (JKT). Uwepo wa bandari hii ulipelekea mji kutanuka haswa maeneo ya Mpiji na Teta.
Mtaa wa Teta ulikuwa na mashamba ya miembe, minazi na mikorosho. Bidhaa mbalimbali zilikuwa zinasafirishwa katika eneo hili zikiwemo vipusa na mchele kwenda Uarabuni kwa kutumia majahazi makubwa.
Eneo ambalo kwa sasa ni Mtaa wa Maputo kulikuwa na shamba enzi za ukoloni na Bagamoyo ilikuwa ni Makao Makuu. Kiongozi mkuu wa eneo hili alkuwa akifahamika kwa jina la GULAMRASSUR na alikuwa ni LALIWI, cheo kama cha Mkuu wa Wilaya (DC) kwa sasa. Kazi yake kubwa ilikuwa ni kusimamia mashamba na wakulima ambao walilazimishwa kulima mazao ya korosho na mihogo.
Mtaa wa Malindi Estate paliitwa MMARANII na palikuwa na jela ya watoto na msikiti ambao ulijengwa na mzungu aliyeitwa BELL ambapo kwa sasa ndio eneo la USALAMA WA TAIFA.
IDADI YA MITAA KATIKA KATA:
Kata ya Mbweni inayo Mitaa mitano ambayo ni: -
Mtaa wa Teta,
Mtaa wa Maputo,
Mtaa wa Mpiji,
Mtaa wa Malindi Estate,
Mtaa wa Mbweni.
Diwani wa Kata hii anaitwaMheshimiwa Single Mohammed Mtambalike.
HALI YA ELIMU KATIKA KATA:
Hali ya elimu katika Kata ni ya kuridhisha, hasa elimu ya msingi na sekondari pamoja na uwepo wa chuo. Aidha kuna shule sita ambazo ni: -
Shule ya msingi Mbweni
Shule ya msingi Kiumbageni
Shule ya msingi Hope and Joy
Shule ya msingi New Era
Shule ya msingi Kids Planets
Shule ya msingi Mount Evarest
SHULE YA SEKONDARI:
Kata ya Mbweni inayo shule sita za sekondari ambazo ni: -
Shule ya sekondari Mpiji
Shule ya sekondari Teta
Shule ya sekondari Dar es Salaam Independent
Shule ya sekondari Shamsiye
Shule ya sekondari New Era
Shule ya sekondari Hope and Joy
CHUO:
Katika Kata ya Mbweni kuna Chuo cha Afya kinachojulikana kwa jina la Nyaishozi College of Health
MAHUSIANO NA WADAU:
Hali ya Mahusiano na wadau katika Kata ni ya kuridhisha kwani hushirikiana pamoja katika kuleta maendeleo.
HALI YA MAENDELEO YA WATU:
Katika Kata ya Mbweni, mipangomiji na uwepo wa miundombinu ya huduma mbalimbali ni ya kuridhisha.
